Tume ya Vyuo Vikuu Tanzania (TCU) ni taasisi ya serikali iliyoanzishwa rasmi tarehe 1 Julai 2005 chini ya Sheria ya Vyuo Vikuu, Sura ya 346. Kazi yake kubwa ni kutambua, kusajili na kutoa ithibati kwa vyuo vikuu hapa nchini Tanzania, iwe ni vya ndani au vya kutoka nje ya nchi. Pia, TCU hufuatilia kwa karibu shughuli zote za vyuo vikuu kuhakikisha mfumo wa elimu ya juu unakuwa bora, wa usawa na unaoeleweka kote nchini.
Kabla ya kuanzishwa kwa TCU, kulikuwepo na taasisi inayoitwa Baraza la Ithibati ya Elimu ya Juu (HEAC) lililoanzishwa mwaka 1995. Hata hivyo, HEAC lilikuwa linashughulikia vyuo vikuu binafsi tu, jambo lililozuia ushirikiano mzuri kati ya sekta ya umma na binafsi katika elimu ya juu. Ili kutatua hilo, serikali ikaamua kuunda taasisi moja – TCU – ambayo itasimamia kwa pamoja vyuo vyote.
- Tovuti rasmi ya TCU ni https://www.tcu.go.tz
Majukumu Makuu ya TCU
TCU inatekeleza majukumu yake katika maeneo matatu makuu:
1. Kazi ya Udhibiti
- Kutoa ithibati kwa vyuo vikuu na programu za masomo.
- Kuhakikisha ubora wa elimu ya juu nchini.
- Kutathmini na kuthibitisha vyeti kutoka vyuo vya nje vinavyotumika Tanzania.
2. Kazi ya Ushauri
- Kushauri serikali, taasisi na umma kuhusu sera na masuala mbalimbali ya elimu ya juu.
- Kushirikiana na taasisi za kimataifa kwenye masuala ya elimu ya juu.
3. Kazi ya Usaidizi
- Kuratibu udahili wa wanafunzi kwenye vyuo vikuu mbalimbali.
- Kutoa mafunzo kwa taasisi kuhusu uongozi, ubora wa elimu, ujasiriamali na uendelezaji wa rasilimali.
- Kusaidia vyuo vikuu kuboresha utendaji wao.
Dira (Vision)
Kuwa taasisi kiongozi katika ukanda huu wa Afrika Mashariki inayosimamia kwa ufanisi ukuaji na ubora wa elimu ya juu Tanzania.
Dhamira (Mission)
Kukuza mfumo wa elimu ya juu wenye usawa, unaopatikana kwa wote, wenye ubora na unaotambulika kitaifa na kimataifa.
Kauli Mbiu
“Vyuo Vikuu kwa Maendeleo”